جامعہ کراچی میں بلوچ طالبات کے لیے رہائش کا مسئلہ

http://liverostrum.com/ur/girls-hostel-issue-in-karachi-university/http://liverostrum.com/ur/girls-hostel-issue-in-karachi-university/

بی بی سی اردو ءِ ھلاسی ءُ بلوچستان

جاوید بلوچ

 دسمبر 2019 ءِ روچ برکت بوھگءَ گوں نہ تہنا یک سالے ھلاس بوت بلکیں یک دہکے ھم آسر بوت ءُ ھمے روچ ءَ جہانی شنکاریءِ یک مزنیں ادارگے کہ آئیءَ بی بی سی اردو گُش انت، آئیءَ ھم وتی میڈیم ویوز ءُ شارٹ ویوزانی اردو شنکاری ھلاس کنگءِ جار جت، ھمے گڈی مراگش آئیءَ ریڈیو شنکاری، ویب سائٹ ءُ سوشل میڈیا بزاں فیس بکءَ تچکائیءَ پیش داشت ءُ گوشدارائینت.

اے مراگشءَ بی بی سی ءِ بازیں گوشداروکانی گلہ ءُ ٹیلی فونءِ سرءَ کُرتگیں کلوہ ھم شنگ کنگ بوت انت کہ ریڈیو مراگشانی ھلاس کنگءِ سرءَ گوش داروک نا وش ات انت، اے گوشداروکانی تہہءَ بازیں چہ بلوچستان، پختونخواہ، اندری سندھ ءُ زرباری پنجابءَ اتاں، آ وتی ایوک ءُ تہنا جہانی ھالانی وسیلہ بی سیءَ لیکگءَ اتاں ءُ بی بی سیءِ کارندہ ھم ھمے گپءَ جنگءَ اتاں کہ آہانی دہرءَ آہاں ھمے مار اِتگ کہ بی بی سی اردو دور دراجیں دمگانی توار انت، ھما دمگ چہ آہانی نامءَ ملکی میڈیا نا آشنا اِنت.

بی بی سیءِ گُشگ اِش انت کہ نو وھدءَ سک باز دیمرئی کتگ، ٹیکنالوجی ودّ اتگ، انٹرنیٹ ءُ سوشل میڈیا ہر ھما ہندءُ دمگءَ رَستگ کہ اودءَ یا ھمک ھما جھگہءَ سر اِنت کہ پہ آہاں بی بی سیءَ وتی اردو شنکاری، حالات حاضرہ ءُ جہانی ھالانی سرءَ کواسانی ھیال ءُ لیکہ شنگ کُرتگ انت، نو سوشل میڈیا کارمرز بوئگءَ اِنت، پمیشکہ نو ریڈیوءِ مراگش بے سوب اَنت، بزاں اے بی بی سی یا برطانیہ سرکارءِ نیمگءَ یک کلوہے کہ آہانی ٹارگٹڈ ایریہ یا ھما ھندءُ دمگ کہ آہانی ھاترءَ بی بی سیءَ مزنیں بجٹے ھرچ ءُ درچ کُتگ، ریڈیو مراگش شنگ کُتگ اَنت اودءَ نو اشیءِ ھچ زلورت نہ اِنت، ءُ ھمے راستی انت،

بگندئے کہ بازیں مردماں بلکیں دور راجیں دمگانی سک باز مردوماں اے راستی جوان مہ لگیت پرچہ کہ آ چہ مزنیں مدتےءَ گوں بی بی سی اردوءَ بندوک بوتگ انت ءُ آہانی گورءَ دگہ ھچ آسراتی نیست کہ آ چہ جہانی پلگاریں ھالاں سرپد بہ بنت، بلے ادا جُست اے چست بیت کہ زاناں پہ آہاں کدی اے شنکاری شنگ کنگ بوتگ اَنت؟

ھما مہلوک یا دمگ اے گلہءَ کن اَنت کہ آ چہ جہانی ھالاں ءُ سرپدیاں چہ زبار کنگ بوئگءَ اَنت، آہاں زانگ لوٹیت کہ آ وَ ھچ بر ھما ٹارگٹڈ ایریہءِ تہہءَ نہ بوتگ اَنت کہ پہ آہاں اردوءِ شنکاری گواتی موجانی سرءَ شنگ کنگ بہ بیت، ءُ ھما کہ اے ھدّءُ ھویلاں بوتگ انت آہاں نوکیں دابءُ ٹیکنالوجیءِ سرءَ بی بی سی اردوءِ شنکاری رَسگءَ اَنت.

ادا یک چیزے المءَ زانگ لوٹیت کہ دنیاءِ ملک چتور ءُ پہ کئےءَ وتی شنکاریءَ شنگ کن انت؟

دومی مزن جہانی جنگءَ چہ ریڈیو شنکاریانی ارزشت بندات بیت ءُ ادا ریڈیو را ھشتمی مزنیں طاقت گُشگ بوت، جرمن پروپیگنڈہءَ نازی پارٹیءِ ھیال ءُ لیکہ ھمک جرمنءَ سر کنگءُ ہٹلرءَ جہانءِ مستریں بامرد پیش دارگء،َ یہودیاں جہانءِ ھراب تریں مردوم ثابت کنگ ءُ آہانی کُشگ ءُ ھلاس کنگءَ شَر لیکگءَ بگر داں برطانیہءِ شنکاری، اے درست ریڈیوءِ سببءَ کنائینگ بوتگ انت.

برطانیہءِ ھلاپءَ ھر وڈیں شنکاریءِ بندات جرمن وزیر جوزپ گیوبلءَ بندات کُت اشیءِ تہہءَ سوبین بوت، ھمے وڑءَ ایڈورڈ آر مرو برطانیہءِ جنگءَ انچوش پیش کنت کہ لس مردمءِ جنگ بہ بیت، نازیانی سوبمند بوئگءَ پد روز ولٹءِ امریکی سرکار ریڈیو شنکاریاں انچوش کارمرز کنت کہ وائس آف امریکہ جہانءِ جوانتریں شنکاری ادارگ جوڑ بیت، امریکہءِ ہر مردم فوجءَ بھرتی بیت ءُ امریکہءِ مہلوک برطانیہءِ رکینگءَ امریکہءِ رکینگ لیک انت، داں جنگءِ آسرءَ امریکہ جاپانءِ سرءَ ارش کنت ءُ جہانءِ سپر پاور جوڑ بیت.

گُشگ بیت کہ ایڈورڈ آر میرو ھالانی پیش کنگءَ انچو زبر بیت کہ لندنءِ سرءَ بوتگیں بمب گواریءَ انچو پیش کنت، گوشداروک بمبانی توار، ھون ریچی ءُ تباہیءَ مار اَنت ءُ لس مردوم سک متاثر بنت، جاپانءِ ھلاپءَ ھم امریکہ انچیں مراگش شنگ کنگ بندات کنت کہ لس امریکی دومی جہانی جنگءَ امریکہءِ جنگ سرپد بوئگءَ لگ انت،

جنگانی وھدءَ ریڈیو انچو کارمرز بوتگ کہ نامداریں بامرد، سیاستدان ءُ ریڈیوءِ توار کارانی توار ءُ نامداریں مراگش دُزگءُ گیگان کنگ بوتگ اَنت ءُ دروگیں ھال شنگ کنگ بوتگ، دومی جہانی جنگءِ وھدءَ ٹوکیو روز ءِ نامءَ انچیں توارے ءُ ہوم سویٹ ہوم ءِ وڑیں مراگش دزگ بوتگ یا کارمرز کنگ بوتگ انت داں دژمن بہ ترسیت ءُ جنگءِ پڑءَ یلہ بہ دنت.

ھمے وڑءَ ویتنامءِ جنگءَ بگر داں بنگلہ دیشءِ جوڑ بوئگء َ( کہ کشگ بیت آل انڈیا ریڈیوءَ مزنیں کردءِ ادا کتگ) ءُ عراقءُ اوگانستانءِ جنگانی تہہءَ ھم ریڈیوءِ شنکاری کارمرز کنگ بوتگ انت داں مہلوکءِ ھمدردی وتی نیمگءَ چکگ بہ بنت ءُ وتی لیکہ مہلوکءِ پگرءِ تہہءَ مان کنگ بہ بیت.

دنیا جہانءِ ہر ھمک ملکءُ سرکار وتی نپ ءُ پائدگءَ کار کنت، چہ آ کاراں اگہ دگہ راج ءُ دمگےءَ نپ رسیت یا تاوان، اے آہانی جیڑہ ءُ جنجال نہ انت، ھمے وڑءَ اگہ بی بی سی اردوءِ شنکاریانی ھلاس بوئگءَ بلوچستانءِ دور ءُ دراجیں دمگ (کہ ادا بجلی ءُ ورگی آپ نیست، انٹرنیٹ سک مزنیں گپے) چہ جہانی ھالاں زبار بنت، اے بی بی سیءِ جیڑہ نہ انت چیاکہ اے دمگ بی بی سی اردوءِ ٹارگٹڈ ایریہ نہ بوتگ انت.
@JavedGwadari